Daku gid nga problema kun maayo gid kuntani ang imo modo kag kadamo sang imo plano para subong nga adlaw, apang gulpi lang nagsakit ang imo ngipon.
Halos bilog nga lawas mo ang apektado kag nagakadulaan na ikaw sang gana, indi bala?
Didto sa isa ka lugar sa Nepal, indi clinic ang dalaganan sang mga tawo sa mga tion nga nagabatyag sila sang sakit sa ngipon kundi isa ka utod nga kahoy.
Kilala ini nga “Toothache Tree” ukon ang Vaisha Dev Shrine nga nahimo na nga tourist attraction kag nahamtang sa makitid nga kalye sa Kathmandu nga amo ang kapital sang Nepal.
Ginapatihan nga ilistaran ini ni Vaisha Dev nga amo ang Newar goddess of toothache.
Indi na maathag kun ano katigulang ang kahoy apang may nagasiling nga yara na ini sang tion sang Lichchhavi Kingdom nga nag-exist sa Kathmandu Valley halin pa sang 400 to 750 CE (Common Era)—ukon ang 1st millennium, ang 50th year sang 8th century, kag 1st year sang 750s decade.
Apisar moderno naman ang teknolohiya sa dentistry sa Kathmandu, ginapili gihapon sang kadam-an nga magkadto sa amo nga “Toothache Tree” para magbutang sang mga sensilyo bangud nagapati sila nga kuhaon sang diyosa ang ila dental problems.
Nagapati sila nga may imahe ang goddess sa sulod sang kahoy, apang tubtub subong, indi mapat-od kun yara pa ang imahe bangud buta na sang mga sensilyo ang kahoy kag wala gid sang nagakuti sini bangud sa ila pagrespeto sa kahoy.
Bangud kaladtuan ini sang mga tawo nga masakit ang ngipon, na-engganyo naman ang mga dentista nga magtukod sang clinic malapit sa lugar kag sa pagkamatuod amo ini ang dental district sang Kathmandu.
Tuman ka sikat ang lugar nga ini nga mangin ang mga turista halin sa amo nga pungsod ang nagatilaw man sa pagpangamuyo kun nabatian nila nga may goddess of toothache nga naga-istar didto.##
(Photo: Wanderlust Travel Magazine)
