𝗠𝗔𝗡𝗜𝗟𝗔 —Ginkumpirmar sang Bureau of Immigration (BI) nga si dismissed Bamban, Tarlac Mayor Alice Guo yara subong sa Indonesia, nag-abot sa lugar halos isa ka bulan matapos ang iya paghalin sa Pilipinas.
Suno kay Immigration spokesperson Dana Sandoval, nagbiyahe si Guo padulong sa Malaysia halin sa Pilipinas sang Hulyo 16, dayon nag-abot sa Indonesia halin sa Singapore sang Agosto 18.
Ginpahayag man sini nga base sa pagbantay sang counterpart intelligence information, natukiban nga yara pa si Guo sa Indonesia.
Nagpasalig man ang natungdan nga ahensya naga-back track na karon sa mga hulag ni Guo agud mahibaluan ang mga tawo sa likod sang iya pagbiyahe. Wala man ginadula sang Immigration ang posibilidad nga ginbuligan sang pila ka immigration officials ang alkalde.
Samtang, si Justice Secretary Jesus Crispin Remulla ang nagpaandam sa mga tinawo sang Bureau of Immigration nga mahimo may labot sa “pagpalagyo” ni Guo nga magguwa kag magsugid sang kamatuoran.
Sa isa ka pribilehiyo nga pamulongpulong sa atubang sang Senado sang Lunes, ginbuyagyag ni Senator Risa Hontiveros nga si Guo, nga ginkilala man nga Chinese citizen nga si Guo Hua Ping, nagbiya sa pungsod sang Hulyo 18 pakadto sa Kuala Lumpur, Malaysia.
Ginpahayag man sang Presidential Anti-Organized Crime Commission (PAOCC) nga naghalin na sa pungsod ang suspendido nga alkalde kag nakapadulong na sa indi magnubo sa tatlo ka pungsod sa Southeast Asia kun sa diin, ang pinakaulihi amo ang Indonesia.
Samtang, ginpahayag ni Immigration Commissioner Norman Tansingco, nga nagasambit sang impormasyon sang intelligence, nga naglusot si Guo paguwa sa pungsod nga wala nag-agi sa mga otoridad sang imigrasyon sang Pilipinas.
Suno kay Sandoval, mahimo nga i-deport sa Pilipinas si Guo kun kanselahon ang iya travel documents.
Ginpahayag naman sang legal counsel ni Guo nga si Stephen David nga ginapasalig siya ni Guo nga “100%” nga yara ini sa Pilipinas.
Si David nagsiling nga nakaistorya niya si Guo sang Lunes, Agosto 19, kag ginsilingan siya nga yara pa siya sa pungsod.
Gin-ako naman sang abogado nga indi niya makumpirmar ang impormasyon kag wala siya sang ideya kon diin gid ang suspendido nga alkalde.
