π ππ‘πππ βNagpositibo sa African swine fever ang mga baboy gikan sa isa sa duha ka mga truck nga na-intercept sa mga livestock checkpoint sa Quezon City kag Valenzuela City.
Suno sa Bureau of Animal Industry, 147 ka mga baboy nga may African swine fever ang nakumpiskar sa Quezon City checkpoint.
Ginpahayag man sang Bureau of Animal Industry, nga ang 11 ka mga baboy nga ginkarga sang isa sa mga truck ang nagapakita sang mga senyales sang impeksyon sang ASF antes pa man ginhimo ang mga blood test.
Ang 38 pa ka mga baboy nga gindala sang isa pa ka truck ang nagnegatibo sa ASF, kon sa diin, gintugutan sang ahensya nga ihawon sila gilayon.
Samtang, ginpahayag man sang Department of Agriculture (DA) nga ginpahamtang ang border controls sa pila ka mga lugar agud mapunggan ang paglapta sang ASF gikan sa isa ka outbreak, partikular sa Batangas.
Ginsulit man ni Agriculture Assistant Secretary for Swine and Poultry Constante Palabrica, isa ka beterinaryo, nga dapat valid ang tanan nga permit kag ang mga kasapatan nga nagapakita sang anuman nga senyales sang balatian ang ipaidalum sa testing.
Nagahingyo man ang ahensya sa mga negosyante kag transporter sang baboy nga magsunod sa mga pagsulundan agud malikawan ang dugang nga paglapta sang ASF kag maprotektahan ang industriya sang baboy sang pungsod.
