𝗜𝗟𝗢𝗜𝗟𝗢 — Nagpanugyan si Iloilo 3rd District Board Member Matt Palabrica sa Provincial Disaster Risk Reduction and Management Council (PDRRMC) nga magpangita sang iban nga pamaaagi agud makuha ang atensyon sang mga pumuluyo nahanungod sa dengue.
Ini kasunod man sa pagpaidalum sa Iloilo sa state of calamity kasunod sang pagtimbuok sang mga kaso sang dengue Iloilo.
Sa interview sang Bombo Radyo kay Board Member Palabrica, iya ginpahayag nga santo sa iya personal nga obserbasyon, nakita niya nga ang ginahimo sang probinsya ang isa ka reaksyon kag indi prevention.
Suno kay Palabrica, daw kaangay lamang nga indi preparado ang probinsya apisar nga makapila na ka beses nga gin-igo sang dengue ang Iloilo.
Ginpahayag man sini nga nangin masako ang lokal nga pamunuan sa pagpreparar sa epekto sang La Niña kag nalipatan na ang mga tikang batok sa makamamatay nga balatian nga dengue.
Gintumod man sini nga ini ang mangin isa na ka leksyon sa publiko kag bisan sa mga opisyal sang gobyerno bangud ang nangin epekto sang dengue ang mas nagalala.
Luwas sa awareness sa social media kaangot sa dengue, tuyo sang natungdan nga mahibaluan ang dugang kag masunod nga mga tikang sang Provincial Disaster Risk Reduction and Management Council.
