ILOILO CITY- Gintuad sang Department of Tourism nga wala pa malab-ot sang Pilipinas ang pre-COVID 19 pandemic nga level sang international tourist arrivals sa Pilipinas.
Apang suno sa ahensya, ang visitor receipts nagapakita sang 116 percent nga recovery.
Sa ginpatigayon nga deliberations sang House Committee on Appropriations sa proposed 2025 budget para sa Tourism Department, ginpahayag ni Tourism Secretary Christina Frasco nga masobra sa 5.45 million foreign tourists ang nagbisita sa pungsod sang 2023.
Target sang ahensiya ang indi magnubo sa 7.7 million international tourist arrivals subong nga tuig, nga mas manubo sa pre-pandemic record high nga 8.3 million sang 2019.
Apang suno sa DOT,ang iban nga metrics sang tourism performance ang naglapaw na sa pre-pandemic levels.
Halimbawa diri ang visitor receipts, nga nagdoble kun ipaanggid sa 2019, samtang ang total employment sa tourism industries ang nagsaka sa 88% sang nagligad nga tuig kun ikumparar sa nagligad nga apat ka tuig.
Nahibaluan nga ang proposed 2025 budget para sa Department of Tourism kag attached agencies sa idalom sang National Expenditure Program ang yara sa P3.39 billion, mas manubo sang 2.8 percent sa budget subong nga 2024 nga P3.49 billion.
