Ginapadasig sang Police Regional Office (PRO) VI sa city kag provincial units ang pag-account sa ila mga personnel nga may kit-anon nga mga tattoo nga kinahanglan kakason.
Sa interview sang Bombo Radyo kay Police Brigadier General Jack Wanky, regional director sang PRO VI, iya ginpahayag nga wala man sang tiyempo nga nahatag kun tubtub san-o ang kaksanay sang visible tattoo apang naghatag na siya sang mandu sa directors nga mag-inspect sa ila nga mga tawo para matuman ini nga mandu.
Gin-athag sini nga ang kalakson nga tattoo amo lamang ang kit-anon gid kun naga-uniporme ang pulis, apang kinahanglan gihapon nga i-deklarar sang mga personnel ang tanan nila nga tattoo sa lawas sa ila affidavit of undertaking.
Pananglitan indi ini matuman, may yara sang pangatubangon nga administrative sanction apang wala pa napatpat ni Wanky kun ano ini nga penalidad.
Sang nagligad nga adlaw sang gin-anunsyo sang Philippine National Police (PNP) nga magapadayon ini sa implementasyon sang ban sa visible tattoos sa mga personnel kag manugsulod nga police officers kasunod sang pag-lift ni PNP chief Gen. Rommel Francisco Marbil sa moratorium sa amo nga lihok.
Base sa PNP national headquarters, ang mga deklarasyon sang pulis sa ila tattoo ang mangin kabahin na sang ila health profiles kag hatagan sila sang tatlo ka bulan para nga maka-comply diri.
Base sa polisa sang police force, wala nalakip sa kakason ang aesthetic tattoos kaangay sang eyebrows ukon eyeliner.
Sandig pa sa ahensya, ang unauthorized tattoos ang nagalakip sang “extremist, ethnically, ukon religiously discriminatory kag offensive, indecent tattoos, racist, sexist, kag tattoos nga naangot sa ginadumilian ukon indi otorisado nga mga grupo.”
