𝗚𝗔𝗭𝗔 𝗦𝗧𝗥𝗜𝗣 —Nagnubo ang mga paglaum para sa isa ka ceasefire sa Gaza Strip, sa diin ang inaway nagapadayon apisar sang pagduso sang Estados Unidos sa Israel kag sa mga militante nga Palestinian nga Hamas nga makalab-ot sa isa ka kasugtanan.
Pagkatapos sang masobra 10 ka bulan nga inaway, ang mga opisyales gikan sa Estados Unidos kag mga Arab mediator nga Egypt kag Qatar natalana nga magkitaay sa Cairo para sa isa ka bag-o nga hugna sang paghambalanay sini nga semana, apang ang kumpirmasyon wala pa matapos.
Ang inaway nga gintunaan sang pag-atake sang Hamas sa Israel sang Oktubre 7 nagguba sang Gaza, nagsaylo sang halos tanan nga populasyon sini sa dimagkubos makaisa kag nagtuga sang isa ka humanitarian crisis.
US Secretary of State Antony Blinken ang nagtapos sang iya pinakaulihi nga paglibot sa Middle East, nga nagatuyo nga ma-finalize ang ceasefire.
Sa isa ka tawag sa telepono, ginduso ni Presidente Joe Biden ang Israeli Prime Minister Benjamin Netanyahu nga batunon ang isa ka kasugtanan, sa tunga sang pag-ipit sang mga pro-Palestinian nga mga nagaprotesta sa kombensihon sang US Democratic party antes sang Nobyembre nga eleksyon sa pagkapresidente.
Ginpasalig man siya ni Biden sa mga panikasog sang Estados Unidos — ang panguna nga kaalyado kag supplier sang armas sang Israel — nga suportahan ini batok sa mga pamahog gikan sa Iran kag mga proxy sini.
Nagpakigbahin man sa panawagan si Vice President Kamala Harris, ang kandidato sang Democratic party sa US presidential election.
