𝗠𝗔𝗡𝗜𝗟𝗔 —Nakigkita si Presidente Ferdinand Marcos Jr. kanday Paris 2024 Olympians golfer nga si Dottie Ardina kag mga gymnast nga sanday Aleah Finnegan, Emma Malabuyo kag Levi Jung-Ruivivar sa Malacañang.
Sa tion sang kahiwatan, ang mga atleta ginhatagan sang Presidential citation bilang pagkilala sa ila “talalupangdon nga pasundayag sa 2024 Paris Olympics.”
Ginhatagan man sila sang cash incentives nga nagabalor sang P1 million halin sa Office of the President kag isa pa ka P1 million halin sa PAGCOR.
Suno sa Malacañang, gin-imbitar man ang golfer nga si Bianca Pagdanganan apang wala nakatambong sa kahiwatan bangud naga-training ini sa luwas sang pungsod.
Sanday Ardina, Finnegan, Malabuyo, Jung-Ruivivar, kag Pagdangan wala nagtambong sa Agosto 13 nga pagbaton kag Agosto 14 nga parada sang mga baganihan nga ginhatag sang Malacañang sa two-time Olympic medalist nga si Carlos Yulo kag sa nabilin nga mga atleta sang Philippine Paris Olympic.
Si Jung-Ruivivar sa isa ka post sa social media nagsiling nga nasakitan siya nga nadula ang makaisa lang sa kabuhi nga kahigayunan bangud wala sila gin-agda sa kahiwatan.
Gin-athag man ni President Marcos nga may yara sang “mix-up” nga sa ulihi nangin kabangdanan nga indi makatambong ang Filipina Olympians sa nasambit nga kahiwatan.
