𝗜𝗟𝗢𝗜𝗟𝗢 —Ginasekyar na sang Police Regional Office 6 (PRO6) ang mga politiko nga magapadalagan sa 2025 elections ilabi na ang may mga security threat.
Sa interview sang Bombo Radyo kay Police Brigadier General Jack Wanky, Regional Director sang Police Regional Office 6, iya ginpahayag nga amat-amat na nila gina-monitor subong ang mga politiko agud nga mapalayo sa ano man nga pagpamahog ilabi na nga nagahilapit na ang eleksyon.
Suno kay Wanky, ginaplano sang talatapan nga mas pasangkaron ang pagbantay sa seguridad sa palibot kon sa diin patigayunon ang hugot nga check points agud malikawan ang firearms incidents.
Ginpahayag man sini nga sa subong, wala pa sang politiko nga nagapangayo sang security sa kapulisan.
Gintumod man sang natungdan nga kon may tuyo man sila nga magpangayo sang security, pagabasehan ang guidelines nga ginhatag sang Commission on Elections (COMELEC).
Nahibaluan nga sang nagligad nga presidential elections, may duha ka dalagko nga firearms incident ang na-record sa Iloilo.
