𝗧𝗨𝗕𝗨𝗡𝗚𝗔𝗡, 𝗜𝗟𝗢𝗜𝗟𝗢 —Ginpangunahan ni Department of Tourism (DOT) Secretary Christina Garcia Frasco ang groudbreaking ceremony kag Memorandum of Agreement signing sa ipatindog nga Tourism Rest Area sa Barangay Igpaho, Tubungan, Iloilo.
Ini kasunod nga ang banwa sang Tubungan ang napilian bilang isa sa apat ka sites sa Western Visayas para sa mga bag-o nga Tourism Rest Areas.
Sa interview sang Bombo Radyo kay Secretary Frasco, iya ginpahayag nga ang proyekto nga nagabalor sang P10,000,000,
pagalakipan sang mga kinahanglanon nga mga pasilidad nga nagatuyo sa pagpauswag kag pagpanami sang eksperyensya sang mga turista.
Suno kay Frasco, lakip man diri ang mga matinlo nga mga comfort rooms, balaligyaan sang kape, balaligyaan sang mga handumanan, learning information para sa mga turista, kag isa ka charging station para sa mga gadgets.
Ginpahayag man sini nga ang ini nga inisyatibo ang kabahin sang mas malapad nga pagtinguha sang Department of Tourism sa bug-os nga pungsod agud mapaayo ang mga eksperyensya sang mga turista sa bug-os nga Pilipinas.
