Ginkumpirma sang Philippine Coast Guard (PCG) nga nag-deploy ang China sang hospital ship malapit sa Escoda Shoal sa West Philippine Sea nga amo ang lugar kun sa diin naka-estasyon kag nagabantay ang BRP Teresa Magbanua.
Suno sa PCG, may isa ka China Coast Guard vessel, 24 ka Chinese maritime militia vessels, isa ka Chinese rescue vessel, kag apat ka Vietnamese fishing vessels nga yara subong sa palibot sang Escoda Shoal.
Suno kay Commodore Jay Tarriela, PCG spokesperson for the West Philippine Sea, ang pinakamayor nga rason sang hulag sang China amo bangud nagapati sila nga permanente na nga magatinir ang BRP Teresa Magbanua sa Escoda.
Kun matandaan, gindeploy sang PCG ang amo nga barko sa shoal bangud may nakit-an nga nagkalaguba nga mga korales kag may na-monitor man nga small-scale reclamation sa amo nga area.
Nag-file anay sang diplomatic protest ang China nga kuhaon na ang barko, apang nagpanindugan ang Pilipinas nga teritoryo sini ang Escoda Shoal kag indi na kinahanglan nga magpangayo pa sang permiso sa Beijing ukon sa anuman nga pungsod kun may ipadala man sila nga vessel.
Suno naman kay AFP Spokesperson Col. Francel Margareth Padilla, kabug-usan nga 129 ka mga barko ang na-monitor nga yara sa West Philippine Sea features halin sang August 13-19.
Kun pahat-pahaton, ginabug-usan ini sang 18 coast guard, 13 navy, kag 98 maritime militia ships nga mas mataas sa 92 ka mga barko nga nasiplatan sa dagat sang Pilipinas halin August 6-12.#
(In Photo: Ang hospital ship nga Silkroad Ark sang Chinese People’s Liberation Army (PLA) Navy. Indi ini ang actual photo. Photo: Screenshot from China Central Television)
