𝗜𝗟𝗢𝗜𝗟𝗢 —Nagapati si Iloilo City Mayor Jerry Treñas nga may kapabayaan sa bahin sang Bureau of Immigration (BI) rason nga nakaguwa si suspended Bamban, Tarlac Mayor Alice Guo sa Pilipinas.
Sa interview sang Bombo Radyo kay Mayor Treñas, iya ginpahayag nga dapat manduan ni President Ferdinand Marcos, Jr. ang nasambit nga ahensya sang ila masunod nga tikang agud nga masiguro nga indi makapalagyo sa mas malayo si Guo.
Suno kay Treñas, daw kaangay nga indi niya maintindihan ang nagkalatabo bangud una pa nga nadakpan ang utod ni Guo nga si Sheila Guo kag ang upod sini nga si Cassandra Li Ong.
Ginpaangid man sini nga kon indi gilayon madakpan ang suspendido nga alkalde, posible mangin kapareho ang sitwasyon kay Kingdom of Jesus Christ (KOJC) leader Pastor Apollo Quiboloy nga tubtob subong, wala sa gihapon nadakpan.
Apang sa pihak sini, nagapati si Treñas nga madakpan si Guo, agud man nga mapasabat ini sa iya nga mga kasal-anan ilabi na sa iligal nga operasyon sang Philippine Offshore Gaming Operators (POGO) sa Bamban, Tarlac.
