𝗜𝗟𝗢𝗜𝗟𝗢 𝗖𝗜𝗧𝗬 —Naglab-ot sa 11 ka mga pamilya ang nadulaan sang puluy-an matapos nga nasunog ang apat ka mga balay sa Brgy. Mansaya, Lapuz, Iloilo City.
Sa interview sang Bombo Radyo kay Fire Officer 2 John Paquito Verano, Arson Investigator sang Bureau of Fire Protection (BFP), iya ginpahayag nga ang apat ka mga balay ang lunsay totally burned, kon sa diin, naghalin ang kalayo sa ika-duha nga panalgan sang balay nga ginapanag-iyahan ni Emilla Dutchilla.
Suno kay Verano, naglab-ot sa P97,000 ang balor sang kahalitan nga natuga sang sunog.
Ginpahayag man sini nga nagapadayon pa ang imbestigasyon sang Bureau of Fire Protection agud matumod ang gintunaan sang sunog.
Ginsaysay man sang natungdan nga naglawig sang kapin isa ka oras ang ila ginhimo pagresponde antes nga natigayon nga madeklara nga fire out.
Nagpadulong naman ang walo ka mga fire truck sa lugar agud nga madasig nga mapapas ang kalayo.
Santo sa inisyal nga imbestigasyon sang otoridad, wala sang na-record nga may nasamaran kag fatalities sa amo nga insidente.
