Duha ka mga Ilongga ang nagdala sang bugal sa Iloilo City matapos nagdaog sa Johor Hibiscus Open Dancesport Championship 2024 nga ginpatigayon sang Agusto 17 sa Malaysia kag Merlion Open Dancesport Championship 2024 nga ginpatigayon sang Agusto 18 sa Singapore.
Ini amo ang mag-classmates kag mag-abyan nga sanday Nicole Mae Doronila Gonzaga sang Bitoon, Jaro, Iloilo City kag Jay Marie Pearl Sabran Gerona sang Barangay Balabago, Jaro, Iloilo City.
Sanday Gonzaga kag Gerona ang classmates sang elementary sa Jaro 1 Elementary School kag sa subong grade 10 student sa Iloilo National High School.
Sa interview sang Bombo Radyo kay Gonzaga, iya ginpahayag nga bata pa lang sila ni Pearl, nahiligan na nila ang dancesport.
Gin-ako man sini nga indi mahapos ang dancesport, apang bangud passion niya ini kag sa bulig man sang iya abyan, nangin maayo man ang bunga sini.
Samtang suno naman kay Gerona, nagtuon ini sa studio sang dancesport.
Siya man ang naga-isahanon sa ila pamilya nga mahilig sa saot bangud kalabanan sa mga ini ang nakatutok sa musika.
Nalipay man ini bangud nagbunga sang mayo ang pagtinguha nila sang iya abyan apisar sa mga pagpanghangkat nga ila naagyan.
Sa Malaysia, nangin Champion ang mga ini sa Synchronised Chacha kag Synchronised Rumba.
Samtang, sa Singapore naman, champion naman ang mga ini sa Synchronised 16 years and below – Rumba – Latin.
