Nakilala-an na ang katapo sang Communist Terrorist Group – New People’s Army (CTG-NPA) nga napatay kasunod sang nagluntad nga engkwentro sa tunga sang rebelde nga grupo kag 61st Infantry Battalion sa Barangay Culyat, Valderrama, Antique, sang Agosto 24, 2024.
Ginkilala ini nga si John Alminaza Capio, Alyas “Ron-ron”, 38-anyos, residente sang Sitio Kadinglian, Barangay Boloc, Tubungan, Iloilo kag anay Squad Leader sang Southern Panay Front kag Regional Sentro de Gravidad sang Lambunao, Janiuay, kag Calinog.
Sa interview sang Bombo Radyo kay Lieutenant Colonel Arturo Balgos, Jr., Commander sang 61st Infantry Battalion, iya ginpahayag nga 2010 sang nagsulod ini sa rebelde nga grupo.
Suno kay Balgos, pito ka mga rebelde lakip si Capio sa mga naka-engkwentro sang Philippine Army sa Valderrama, Antique, kon sa diin, nagapahuway ang mga ini sang nagsugod ang pagbaylohanay sang bala.
Ginpahayag man sini nga bangud sa sunod-sunod nga operasyon sang militar sa mga nasambit nga banwa, natigayon nga natultolan ang nabilin nga mga rebelde.
Na-recover man ang matag-as nga de-calibre nga armas-luthang sang mga rebelde lakip ang apat (4) ka M16; isa (1) M14; fifteen rounds sang 7.62 mm live ammunition; forty-three nga 5.56mm live ammunition, kag duwa (2) ka long magazine sang M16 rifle.
Sa subong, ang bangkay ni alyas Ron-ron ang yara sa TEDCO Funeral Homes sa Tubungan, Iloilo, kag natalana nga magabisita subong nga adlaw ang iya iloy kag utod agud maghimo sang dugang nga kahimusan.
