Hugot nga nagapatuman sang massive cleanup drive ang Iloilo City General Services Office (GSO) sa syudad agud maprotektahan ang residente sa makamamatay nga dengue virus.
Sa interview sang Bombo Radyo kay Engineer Niel Ravena, head sang General Services Office, iya ginpahayag nga ginahatagan sang prayoridad sang talatapan ang sa top 2 ka mga kabarangayan sa tagsa ka distrito sang Iloilo City nga may pinakamataas nga kaso sang dengue.
Suno kay Ravena, nagakoordinar ang GSO sa Iloilo City Health Office agud nga matumod ang mga lugar nga nagakinahanglan sang gilayon nga pagpanglimpyo.
Ginpahayag man sini nga nag-augment man ang talatapan sang mga personnel sang Community Environment and Natural Resources Office (CENRO) ilabi na sa Barangay Calumpang, Molo bangud ini ang may pinakamataas nga dengue cases nga na-record.
Nag-assign man ang GSO sang mga street sweepers sa mga na-identify nga barangay nga may mataas nga kaso sang dengue agud nga malimpyohan kag mapapas ang mga breeding ground sang mga lamok, kaangay na lamang sang tubig sa kanal.
Ginpasigurado naman sang natungdan nga may mga available nga truck ang ginapalibot sa syudad agud nga magkolekta sang basura nga matipon sa clean up drive.
