𝗜𝗟𝗢𝗜𝗟𝗢 —Suportado sang Police Regional Office VI (PRO6) ang ginapatuman nga law enforcement operation sang Police Regional Office XI (PRO11) batok kay Kingdom of Jesus Christ (KOJC) leader Pastor Apollo Quiboloy.
Sa interview sang Bombo Radyo kay Police Lieutenant Colonel Arnel Solis, Spokesperson sang Police Regional Office VI, iya ginpahayag nga sumpa nga katungdanan kag obligasyon sang Philippine National Police (PNP) nga ipatuman ang kasuguan kag ang legal nga mga mando paagi sa competent judicial kag duly constituted authorities.
Suno kay Solis, ini nga tikang ang nagapaiway sa personal nga interes, political affiliations, relihiyoso nga pagpati, kag mga pagpasulabi sa ideolohiya.
Ginpahayag man sini nga kabahin ini sa mandato sang PNP nga mag-alagad kag mag-amlig sa pumuluyo paagi sa pag-uphold sang konstitusyonal nga prinsipyo sang patas nga protection sang mga kinamatarung sa idalum sang layi.
Gintumod man sang Police Regional Office VI nga ang tikang nagakahulugan man nga ang kasuguan dapat magamit sa tanan kag nga wala sang isa nga labaw diri.
Bisan ang isa ka self-proclaimed Son of God ang indi makaluwas sang iya kaugalingon gikan sa pagsunod sa penal kag procedural laws.
Nagpahayag man sang suporta ang talatapan kay Police Brigadier General Nicolas Torre III bangud sa pagpabilin sini nga wala nagakabalaka sang black propaganda nga ginahaboy batok sa iya kag bangud man sang katutom sini sa iya katungdanan bilang isa ka pulis.
