𝗜𝗟𝗢𝗜𝗟𝗢 𝗖𝗜𝗧𝗬—Ginalauman nga magapatigayon sang State of the City Address (SOCA) si Iloilo City Mayor Jerry Treñas sa Septyembre 9, 2024.
Sa interview sang Bombo Radyo kay Mayor Treñas, iya ginpahayag nga tuyo sini hatagan sang ‘focus’ ang amo nga programa matapos ang 87th Iloilo City Charter Day.
Suno kay Treñas, ang iya nga State of the City Address ang mangin palaagyan agud nga mahatagan sang direksyon ang pamunuan sang syudad sa masunod pa nga tinuig.
Ginpahayag man sini nga sa amo nga tion man niya ilatag ang mga plano kag tinutuyo sang syudad nga lab-oton ilabi na sa mga proyekto.
Ginkalipay man sang alkalde ang mga nangin madinalag-on nga proyekto kag mga achievements sang Iloilo City lakip na ang fully digitalized nga pagproseso sang mga business permits para sa mga negosyante.
Tuyo man nga iplastar sang natungdan sa publiko ang klaro nga statement nahanungod sa binuhatan sa idalum sang iya nga liderato.
Gindayaw man ni Treñas ang mga empleyado sang city government bangud nagapati ini nga kon wala sila, indi malab-ot sang syudad ang madamo nga awards.
