ILOILO —Magatanyag sang Local Peace Engagement Program ang Iloilo Provincial Government sa mga myembro sang rebelde nga grupo nga magabalik sa sabak sang gobyerno.
Sa interview sang Bombo Radyo kay Iloilo Governor Arthur Defensor, Jr., iya ginpahayag nga isa sa ginapangatubang subong sang pungsod amo ang armed conflict nga indi makatuga sang maayo sa gobyerno kag sa mga Pilipino.
Suno kay Defensor, ginapasiguro sang lokal nga pamunuan nga kon ang armed conflict ang nagakatabo sa probinsya, may nagakaigo nga bulig sa pamilya ukon mismo sa rebelde.
Ginpahayag man sini nga masubo nga nagakatabo ang amo sini nga hitabo, apang indi sini mapunggan bangud ini amo ang reyalidad.
Ginsaysay man sang gobernador nga ginahimo nila ang masarangan agud mapalig-on ang local peace engagement sa tunga sang mga rebelde nga grupo kag gobyerno.
Nagapakig-angot man ang provincial government sa mga kabarangayan sa nabukid nga bahin sang Iloilo agud nga maghatag sang programa nga makabulig pagpauswag sang pangabuhi sang mga pumuluyo.
