Ginpahanumdom sang Commission on Elections nga tubtub gid lamang sa Septyembre 30, 2024 ang ihatag nga tyempo sa rehistrasyon para sa mga luyag magboto sa 2025 midterm elections.
Suno kay Atty. Dennis Ausan, regional director sang poll body sa Western Visayas, pagkatapos sang deadline sa Septyembre 30, mangin masako naman ang opisina para sa filing sang certificates of candidacy.
Base man sa abiso nga ginpaguwa sang Central Office, magalawig lamang tubtub sa Agusto 31 ang Register Anywhere Project kun sa diin mahimo maka-rehistro ang applicants sa designated sites sa ila tagsa sa areas.
Sa sini nga period, bukas ang satellite registration sites halin Lunes tubtub Sabado lakip na sa holidays.
Kun magtakop na ini nga Register Anywhere Project sa Sabado, personal na ang rehistrasyon sa Comelec offices sa sulod sang isa ka bulan samtang ang mga Pilipino naman sa luwas sang pungsod ang mahimo maka-apply sa ila nga mga embahada.
Suno naman kay Ausan, kun matapos na ang period sa filing sang certificates of candiday sa Oktubre 1-8, iga-determina na ang contending parties sa mga probinsya, syudad, kag mga banwa kag dira pa lamang ma-evaluate kun diin nga mga lugar ang may intense political rivalries.
Gin-athag sang regional director nga magapungko pa sila kaupod sa law enforcement officials agud nga maplastar ang security situation sa bug-os nga rehiyon kag matumod ang kinahanglan nga mga preparasyon.
Samtang wala pa ang evaluation suno sa natungdan, premature ang mga report nga magamo ang Western Visayas kun pagahambalan ang eleksyon.##
