𝗧𝗜𝗚𝗕𝗨𝗔𝗡, 𝗜𝗟𝗢𝗜𝗟𝗢 —Nagkalaguba gid ang 21 ka mga propedad sa Barangay Namocon, Tigbauan, Iloilo sang naglaslas ang isa ka buhawi ginabanta mga alas-7:00 sang gab-i kahapon nga adlaw.
Sa interview sang Bombo Radyo kay Punong Barangay Rewil Gabucay sang Brgy. Namocon,Tigbauan, Iloilo, iya ginpahayag nga matapos nag-untat ang pag-ulan-ulan sa ila nga lugar, nagsunod man labay ang pugtak-pugtak nga buhawi nga nagpalid sang mga atop sang pila ka mga panimalay, resort.
Suno kay Gabucay, bangud man sa mabaskog nga paglaslas sang buhawi, nagguba ini sang pila ka mga sakayang pandagat.
Ginpahayag man sini nga santo sa ila latest nga data, yara sa 14 ka mga balay ang nagkalaguba, 3 ka cottages, kag 4 ka mga pumpboat.
Gintumod man sang natungdan nga maayo lang kay wala man sang may nasamaran sa natabo nga kalamidad.
Temporaryo naman subong nga nagatinir ang mga pamilya nga nagub-an sang puluy-an sa ila nga barangay hall.
