𝗜𝗟𝗢𝗜𝗟𝗢 𝗖𝗜𝗧𝗬—Gin-ransak sang wala pa makilal-an nga mga indibidwal ang Iloilo Supermart sa Barangay Tabuc Suba, Jaro, Iloilo City subong gid lamang nga adlaw.
Sa interview sang Bombo Radyo kay Police Major Eduardo Siacon, hepe sang Jaro Police Station, iya ginpahayag nga nadiskubrihan sang empleyado nga may kinutkutan nga buho nga nahamtang sa daan nga entrance sa sulod sang establisyemento.
Suno kay Siacon, ginalantaw nga ang buho ang posible nga gingamit sang mga suspetsado bilang alagyan agud nga makasulod sa nasambit nga mall.
Ginabulubanta naman nga kaagahon natabo ang insidente, kon sa diin, nag-agi sa drainage ang mga nagpangransak lapos sa ginbuhuan nila nga semento sa daan nga entrance sang mall.
Na-recover naman ang tatlo ka mga bara de cabra, lagari sang salsalon kag styro box sa drainage kun sa diin nag-agi ang mga suspetsado.
Sa subong, padayon sa gihapon ang pag-imbestigar sang kapulisan sa pag-ransak sa nasambit nga establisyemento.
