𝗜𝗟𝗢𝗜𝗟𝗢 𝗖𝗜𝗧𝗬—Nangin palaligban sa pila ka mga kabarangayan sa Iloilo City ang pag-augment agud nga matumod ang breeding places sang mga lamok sa tagsa ka lugar.
Sa interview sang Bombo Radyo kay Iñigo Garingalao, head sang Iloilo City Agriculturist Office, iya ginpahayag nga nagpatuman sila sang ocular inspection sa pila ka mga barangay lakip na diri ang Barangay Sooc, Arevalo, Iloilo City.
Ini kasunod man nga ang nasambit nga barangay ang may nagapanguna nga kaso sang dengue sa bilog nga syudad sang Iloilo.
Suno kay Garingalao, halos sa duta sa amo nga barangay ang ‘wet land’ ukon basa rason nga madasig pangitlogan sang mga lamok.
Ginpahayag man sini nga ginbuy-an sang talatapan ang pila ka mga tilapia sa lugar agud nga kaunon sini ang mga itlog sang lamok kag ini na mangin breeding ground.
Gin-athag man sang natungdan nga indi lamang ang ila nga talatapan ang nagapatuman sang pila ka mga tikang agud nga mapapas ang lamok sa syudad.
Gintumod man niya nga lakip sa mga nagahulag nga talatapan kaupod ang City Agriculturist Office amo ang General Services Office (GSO) nga nagapatuman sang mga cleanup drive activities.
