Indi na pag-i-detain ang authorized representative sang Philippine Offshore Gaming Operator (POGO) hub nga Lucky South 99 nga si Cassandra Li Ong sa Mandaluyong Women’s Correctional Facility apang magapabilin gihapon ini sa kustodiya sang House of Representatives.
Ginbawi sang quad committee ukon apat ka mga komitiba sa Kamara ang ila ikaduha nga contempt citation batok kay Ong sang nagpakita na ini sa kooperasyon sa proceedings sang mga mamalidha.
Ini nga quad committee amo ang naga-imbestigar sa kaangtanan sang Lucky South 99 sa iligal nga mga operasyon sang POGO.
Isa sa chairpersons sang panels nga si Laguna Representative Dan Fernandez ang nagsiling nga ang first contempt order kay Ong ang nagapabilin nga buot silingon magatinir siya gihapon sa kustodiya sang Kamara.
Ginsiling naman sang isa pa ka panel head nga si Surigao del Norte Rep. Ace Barbers nga gin-lift ang second contempt order kasunod sang motion ni Lanao del Sur Rep. Zia Alonto Adiong bilang konsiderasyon man sa pagkooperar na ni Ong samtang nagadugay ang hearing.
Gin-lift man sang panel ang contempt kag subsequent detention order batok sa Lucky South 99 documented corporate secretary nga si Ronelyn Baterna.
Una nga nagpamalibad si Ong sa pagsabat sa mga pamangkot apang sang ulihi nagsiling nga madamo siya sang accounts sa China bank nga amo ang ginagamit sa Lucky South 99 transactions.
Gindugang sini nga involved siya sa real estate business nga nagaarkila sa office spaces para sa POGO hubs lakip na ang Lucky South 99.
Ginpahayag man sini nga naghalin siya sa Manila paagi sa Ninoy Aquino International Airport (NAIA) agud magkadto sa Singapore, sunod nga nagkadto sa Malaysia kun sa diin nakigkita ini sa iya nobyo nga si Wesley Guo nga utod ni former Bamban, Tarlac mayor Alice Guo amo man ni Shiela Guo.
Ginsiling man ni Ong nga siya kag ang Guo ang nagbyahe pakadto sa Batam, Indonesia kun sa diin nadakpan siya kag si Sheila kag ginbalik diri sa Pilipinas.
Antes ini nga mga rebelasyon, ginmandu pa nga i-detain siya kuntani sa correctional facility bangud sa pagpamalibad sa iya mga sabat kag naga-invoke sa iya kinamatarong nga maghipos kag nagahambal man nga “I refuse to testify.” #
