Ginakabig ni anay Justice Secretary kag anay senador Atty. Leila de Lima nga amat-amat na nagaguluwa ang kamatuoran sa kontrobersyal nga drug war ni anay Presidente Rodrigo Duterte paagi sa serye sang hearings nga ginapatigayon subong sang quad committee sa Kamara.
Sa isa ka symposium sa University of the Philippines – Iloilo City campus, ginplastar ni De Lima nga indi drug lords ang ginpanglagas ni Duterte sang ginpatuman ang war on drugs kundi ang iya “competitors” sa illegal drug trade.
Pamatuod diri suno sa iya ang pag-proteher sang former president kag pagpakig-partner sa dalagku nga Chinese drug lords sa Davao City lakip na si Michael Yang.
Si Yang amo ang nagpungko man anay nga former presidential adviser kag sa una nga quad committee hearing sang Kamara sa Bacolor, Pampanga, isa siya sa ginhingadlan sang former intelligence officer sang Bureau of Customs nga si Jimmy Guban nga amo ang nagapanag-iya sang P11-billion nga balor sang illegal drugs shipment nga nakumpiskar sa Manila sang 2018.
Magluwas kay Yang, matandaan nga gin-implicate man ni Guban sanday Davao 1st District Representative Paolo Duterte kag bana ni Vice President Sara Duterte nga si Mans Carpio.
Suno kay de Lima, isa ka peke nga drug war ang ginhimo sang former president.
“I call it the unraveling of truth. Dapat lang lumabas na ang katotohanan,” pahayag sini kaangot sa nagapadayon pa nga joint public hearing sang House Committees on Dangerous Drugs, Public Order and Safety, Human Rights, and Public Accounts.
Sa amo man nga event sa Iloilo City, una na nga ginpahayag ni De Lima nga handa siya nga magpungko kag mag-assist kay former Iloilo City Mayor Jed Patrick Mabilog nga nalagyo sa Pilipinas bangud sa kahangawa sa possible asasinasyon nga himuon sa iya. Si Mabilog ang gin-tag anay ni Dutere nga “drug protector” kag gintawag man anay sini ang Iloilo City nga “most shabulized city.”
