Naglakip ang Bureau of Quarantine sang update sa electronic travel (eTravel) form nga dapat fill-upan sang mga international travelers agud malikawan ang pagsulod sang makamamatay nga mpox variant halin sa luwas sang pungsod.
Suno sa Department of Health (DOH), kon ang isa ka biyahero magsabat sang “huo” kon pamangkuton kon bala nagmasakit sila sa nagligad nga 30 ka adlaw, ang drop-down list magalakip na karon sang “mga rashes, vesicles, ukon blisters,” nga mga sintoma sang mpox.
Ang iban pa nga kinaandan nga mga sintomas sang mpox nagalakip sang hilanat, pagsakit sang ulo, muscle pain, pagsakit sang likod, manubo nga enerhiya, kag nagahubag nga mga lymph node.
Nagpahayag man ang DOH nga importante para sa tanan nga mga nagabiyahe nga mangin tampad sa pagsabat sini nga pamangkot.
Gin-athag man sang ahensya, nga ang gamay apang daku nga pagbag-o sa mga pamangkot sa screening sang Bureau of Quarantine makabulig sa pagtapna sang pagsulod sang mga kaso sang mpox gikan sa luwas sang pungsod, partikular ang Clade 1b, nga ginapatihan nga amo ang mas makahahalit nga porma sang mpox nga nagatuga sang pangkalibutanon nga alarma.
Kon ang Bureau of Quarantine makadeterminar sang isa ka ginasuspetsahan nga kaso sang mpox, sila pagaatipanon kag pagadal-on sa isa ka mpox referral hospital.
Nahibaluan nga ang highly transmissible Clade 1b strain sang virus ang nagpatay sang ginatos ka mga tawo sa Democratic Republic of Congo kag na-detect man sa Burundi, Kenya, Rwanda, Uganda, kag Sweden.
Samtang ang Pilipinas naka-detect sang 14 ka kaso sang mpox halin sang 2022, nga may 5 ka aktibo nga kaso. Ginpahayag man sang DOH nga ang lokal nga kaso sang mpox amo ang mas mild nga Clade 2 variant.
