Ginhatagan sang Estados Unidos kag China sang importansya ang regular nga military-to-military communications bilang kabahin sang mga pagtinguha nga malikawan ang ila mabaskog nga kompetisyon nga posible makatuga sang conflict.
Nalab-ot ang kasugtanan sa isa ka pagsinapol sa Beijing sa tunga sang US National Security Adviser Jake Sullivan kag Gen. Zhang Youxia, bise chairman sang China’s Central Military Commission.
Nakigkita si Sullivan kay Chinese President Xi Jinping sa Great Hall of the People sa Beijing.
Sa katapusan nga adlaw sang tatlo ka adlaw nga pagbiyahe sa China, ginkilala nanday Sullivan kag Zhang, ang pinakamataas nga unipormado nga opisyal sang militar sang China, ang pag-uswag sa amo nga mga komunikasyon sa sulod sang nagligad nga 10 ka bulan kag nagplano sa pag-organisar sang theater commander phone call para sa palaabuton.
Bangud diri, ang sitwasyon ang nagbag-o sugod sang isa ka kasugtanan sa tunga ni US President Joe Biden kag Xi sang tungatunga sang Nobyembre sa pagbukas liwat sang direkta nga paghambalanay sang military-to-military sa pila ka lebel.
Sa iya pagkit-anay kay Zhang, si Sullivan nagsiling nga ang kalinong kag kalig-unan sa palibot sang Taiwan, nga ginaangkon sang China nga kabahin sang iya teritoryo samtang masami nga nagahimo sang mga pasundayag sang pwersa, importante, suno sa White House.
Lakip man diri nga ang White House nagsiling nga ginhatagan pagtamod ni Sullivan nga ang Estados Unidos nagapabilin nga committed sa pagpadayon sang kahilwayan sa navigation sa South China Sea kag nagpabutyag sang pagkabalaka sa suporta sang China sa Russia sa ila defense industrial base.
