Dakop ang apat ka mga magbarkadahay sa ginkasa nga drug buy bust operation sa Brgy. Bacjawan Sur, Concepcion, Iloilo.
Ang naaresto amo sanday alyas “Leovie”, 48 anyos, may-asawa, Street Level Individual; alyas “Kim”, 31 anyos; alyas “Jonjie”, 32 anyos, soltero, kag si alyas “Jena”, 30 anyos.
Sa interview sang Bombo Radyo kay Police Major Ken Albert Lepsia, hepe sang Concepcion Municipal Police Station, iya ginpahayag nga isa ka bulan nga gin-surveillance ang mga subject bangud man nga nagadula-dula sa ila ginatiniran.
Suno kay Lepsia, naabtan pa sang ila katapo ang tatlo ka subject nga naga-pot session sa sulod sang isa ka unit nga gina-arkilahan man sang subject.
Ginpahayag man sini nga nakit-an man ang empty sachets kag used foil sa isa ka trash bag sa sulod sang puluy-an.
Ginabanta naman nga ang nakuha nga 40 grams sang suspected shabu ang may standard drug price nga P272,000.
Lakip man sa mga na-recover sang kapulisan ang homemade shot gun nga may unod nga duha ka mga bala.
