Ginalantaw sang direktor sang Iloilo City Police Office (ICPO) nga makaapekto sa kaso sang pag-ransak sang Iloilo Supermart kon magabutang sila sang timeline agud masolbar ang kaso.
Sa interview sang Bombo Radyo kay Police Captain Kim Legada, director sang Iloilo City Police Office, iya ginpahayag nga sa baylo sang timeline, mas magatutok sila sa pagpangita sang ebidensya agud madasig nga matumod ang mga suspetsado.
Suno kay Legada, ginalantaw man sang talatapan nga kon may timeline basi makulangan sa oras kag indi maid-id nga matun-an ang kaso.
Gin-athag man sini nga bisan hinay lang ang dalagan sang kaso kon kompleto ang mga ebidensya agud nga indi man magresulta sa dismissal ang amo nga kaso.
Wala naman sini ginaplano nga magtukod pa sang task force agud nga resolbahon ang kaso.
Dako naman ang pagpati sang otoridad nga isa lang ang mga suspetsado kag ang termite gang nga naghimo sang pagpangawat.
Ini base man sa nakit-an nga kinutkutan nga buho nga nahamtang sa daan nga entrance sa sulod sang establisyemento.
Nahibaluan nga P1.5 million ang nataban sang mga suspek matapos nga nag-agi sa drainage lapos sa tunnel nga walo tubtob pulo ka metros pasulod sa store.
