ILOILO CITY- Pilason ang kilala nga negosyante sa Mina, Iloilo sang aksidente nga natiruhan ang iya kaugalingon samtang ginpaarakan-luthang sang wala makilal-an nga mga tawo sa iya rest-house sa iya poultry farm.
Ang biktima amo si Teodoro “Tikboy” Camarista, 66, residente sang Amiroy, Mina.
Sa interview sang Bombo Radyo kay Camarista, iya ginpahayag nga nakabati siya sang taghol sang ila mga ido.
Suno kay Camarista, didto na ini nakabati sang lupok sang pusil.
Pahayag niya, nagkuha man ini sang iya armas kag nagbalos apang bangud patay ang mga suga,wala sini makit-an ang mga tawo nga naga-target sa iya.
Didto na naglupok ang pusil kag naigo niya ang iya tiil samtang nagailis sang magazine.
Nagapadayon pa ang imbestigasyon sa insidente.
Wala naman ginadula ni Camarista ang posibilidad nga naangot sa pulitika ang natabo.
Matandaan nga si Camarista ang nagpadalagan sa pagka-alkalde sang 2022 kag nagpabutyag man nga magakandidato liwat sa eleksyon sa 2025.
