Ginkalipay ni Iloilo City Mayor Jerry Treñas ang madamo nga nagtambong sa ginhiwat nga Liga Day 2024.
Sa interview sang Bombo Radyo kay Mayor Treñas, iya ginpahayag nga tuman ini ka imporante para sa iya bangud isa ini ka venue agud nga magtipon ang mga opisyales sang tagsa ka mga barangay sa Iloilo City.
Suno kay Treñas, tuman ang iya kalipay bangud ini ang pinakadamo nga nasaksihan niya sa paghiwat sang amo nga event.
Ginpahayag man sini nga mangin madinalag-on lamang ang local government unit kon nagaupod ang tagsa ka mga barangay sa hilikuton kag plano para sa syudad.
Nagpasalamat man ang alkalde sa kabarangayan sa syudad sa ila nangin kontribusyon agud malab-ot sang city government ang mga plano sini.
Nahibaluan nga out of 180 ka mga barangay sa Iloilo City, naglab-ot sa 174 diri ang nagtambong sa amo nga kahiwatan.
