Ginkondenar sang Estados Unidos ang pinakaulihi nga pagbunggo sang barko sang China sa isa ka sakayan pandagat sang Pilipinas sa West Philippine Sea, kag nagsiling nga dapat sundon sang Beijing ang international law kag untaton ang makatalagam nga mga hulag sini sa kadagatan.
Kon balikan, isa ka sakayan sang China Coast Guard sang Sabado ang hungod nga nagbunggo sa Philippine Coast Guard vessel BRP Teresa Magbanua sang makatatlo ka beses sa Escoda Shoal apisar nga wala sang provocation halin sa bahin sang Pilipinas.
Si Matthew Miller, ang spokesperson sang US State Department, nagsiling nga ang Estados Unidos nagapanindugan upod sa Pilipinas kag nagapakamalaut sang makatalagam nga mga akto sang People’s Republic of China (PRC) batok sa legal nga mga operasyon sa kadagatan sang Pilipinas sa palibot sang Sabina Shoal sa West Philippine Sea.
Liwat man nga nagpanawagan ang Estados Unidos sa China nga i-comport ang iya mga pag-angkon sa internasyonal nga kasuguan kag mag-untat sa makahalalit nga tikang.
Ginhatagan man sini sang igtalupangod ang ‘unlawful claims of ‘territorial sovereignty’ sang Beijing sa kadagatan kag ang agresibo nga mga akto nga nagapamahog sa kahilwayan sa navigation.
Si British Ambassador Laure Beaufils nagpahayag man nga ang United Kingdom nagakabalaka sa mga report sang makahalalit nga mga tikang sang isa ka sakayan sang China malapit sa Sabina Shoal.
Ginpamatud-an man sang Estados Unidos ang ila Mutual Defense Treaty sa Pilipinas, nga nagapukaw sang suporta sang Washington sa tion sang armado nga pag-atake sa armed forces of the Philippines, mga sakayan pandagat, ukon eroplano — lakip na ang iya Coast Guard — bisan diin sa West Philippine Sea.
Nahibaluan nga padayon nga ginaangkon sang Beijing ang halos bug-os nga West Philippine Sea, sa pihak sang desisyon sang international nga korte nga nagasiling nga wala ini sang legal nga basehan para sa ila mga claims.
