Nagpahanumdom ang eksperto sa publiko nga maghalong sa mga peke nga dermatologists kag aestheticians nga naga-perform sang illegal procedures nga posible makaapekto sa ikaayong-lawas.
Sa interview sang Bombo Radyo kay Dr. Aizylnn Anne Robledo, Dermatologist, iya ginpahayag nga mag-andam sa mga dermatologists kag aestheticians nga wala sang standard nga trainings kag certificate nahanungod sa derma procedures.
Suno kay Robledo, ang mga aestheticians ang wala sang kinamatarong nga mag-inject ukon mag-opera sa isa ka pasyente ilabi na nga indi sila isa ka doctor kag dermatologist.
Ginpahayag man sini nga ang aesthetic doctors lamang ang may sarang nga magpatuman sang aesthetic procedure bangud sila ang nakapasar sa Philippine Medical Licensure Examination.
Gin-athag man sang natungdan nga siguraduhon nga may lisensya ang isa ka dermatologist antes magpaidalum sa isa ka procedure.
Gintumod man sini nga indi buot silingon nga kon naka-training sa isa ka programa, lehitimo na ini nga isa ka aestheticians, bangud ang matuod-tuod nga aesthetician ang naga-require sang tinuig nga training kag may pamatuod nga sertipiko halin Philippine Medical Licensure Examination.
