ILOILO – Naghatag sang inspirasyon ang isa ka Registered Criminologist bangud sa iya paghimakas antes nakapasar sa July-August 2024 Criminology Licensure Exam.
Ini amo si Vincent Blas Nasalga, graduate sang Bachelor of Science in Criminology sa PHINMA University of Iloilo kag residente sang Barangay Narorogan, Miagao, Iloilo.
Sa interview sang Bombo Radyo kay Nasalga, iya ginpahayag nga walo sila ka mag-utod sa diin ang iya mga ginikanan ang nagatrabaho sa uma.
Suno kay Nasalga, sang una, naghamdom ini nga magsulod sa Philippine Army, apang ginpanugyanan ini ang iya mga utod nga mag-eskwela agud may yara ini sang degree.
Agud may inugasto man sa iya allowance, nagabulig man ini sa iya iloy nga nagabaligya sang mga kakanin.
Sang tion sang pandemya suno sa natungdan, nangin isa man ini ka manug-uling, manugpangisda kag driver.
Nagbunga naman ang iya pagtinguha bangud isa na ini subong ka Registered Criminologist sa diin nagaplano na ini subong nga mag-apply agud mangin pulis.
