Nasapwan nga wala na sang kabuhi ang isa ka babaye sa sulod sang iya apartment sa Jalandoni Street, Brgy. Our Lady of Lourdes, Jaro, Iloilo City.
Ang biktima amo si Jinky Ventura, 26-anyos, empleyado sang Commission on Higher Education (CHED) – La Paz, kag tumandok sang Sara, Iloilo.
Sa interview sang Bombo Radyo kay Rene Nuestro, security guard sang apartment, iya ginpahayag nga makatatlo ka beses nga gintungkab ang pwertahan sang hulot sang biktima antes ini nga natigayon nga masulod.
Suno kay Nuestro, may nagaguwa nga bukal sa baba sang biktima sang ini ang nasapwan sang iya nga mga board mates.
Ginlaragway man sini nga yara sa ika-lima nga panalgan sang apartment ang kwarto sini kag ulihi nakit-an kahapon sang aga sang nagbakal ini sang iya nga pamahaw.
Gintumod man sang natungdan nga nang-hagda pa ang biktima antes ini nagsaka sa iya kwarto.
Nahibaluan nga tatlo pa lang ka bulan nga nagatinir ang biktima sa amo nga apartment.
