Magarampa bilang isa sa official candidates sa Miss Universe New Zealand 2024 si anay Miss Universe Philippines Charity Victoria Velasquez Vincent ukon kilala bilang si VVV.
Sa iya Instagram broadcast channel, gin-anunsyo sini nga mangin kabahin siya sang amo nga pageant bilang paagi sa paghatag-dungog sa heritage sang iya amay.
“I’ve always been proud of being mixed race. I’m a symbol of my parent’s love, which endured so much discrimination back when they first got together,” pahayag sini.
“Time to honor my dad’s side of my heritage and the country where I took my first step, spoke my first word, had my first heartbreak and earned my double master’s degree I never shut up about,” dugang ni VVV.
Apang ginplastar sini nga indi gid madula sa iya ang iya Filipino roots: “Mahal kong Pilipinas, lagi kayong nasa puso ko. Kahit saan, Kahit kailan.”
Nahibaluan nga yara sa bag-o nga management ang Miss Universe organization sa amo nga pungsod.
Antes ang anunsyo ni VVV, ginkumpirma na nga ang Filipino Kiwi model-turned-actress nga si Franki Russell ang magatiglawas sang amo nga pungsod sa idalom sang Yugen PR management apang nag-withdraw ini sang ang local license holder sang Miss Universe New Zealand ang nag-cancel sang franchise bangud sa indi pag-comply sa specific order sang organization.
Patigayunon ang koronasyon sa amo nga pageant sa September 29 sa Dorothy Winstone Centre Performing Arts Theatre.
Si Victoria nga nabun-ag kag nagdaku sa New Zealand ang nag-compete diri sa Pilipinas sang 2021 kun sa diin nakuha sini ang title nga Miss Universe Philippines Charity sang ginrepresentar ang Cavite. Sa recent edition sang Miss Universe Philippines, gintiglawas sini ang Bacoor City kag nagtapos sa semi-final round.
