Patay ang duha ka pulis kag isa ka abogado sa nagluntad nga shooting incident sa isa ka subdivision sa Tagaytay City, Cavite.
Ang mga ginbawian sang kabuhi amo sanday Police Captain Adrian Binalay sang Criminal Investigation and Detection Group – National Capital Region (CIDG-NCR) kag Police Captain Tomas Ganio Batarao Jr. nga naka-assign naman sa Regional Personnel Holding Accounting Section (RPHAS).
Suno kay Philippine National Police (PNP) Public Information Office (PIO) chief Colonel Jean Fajardo, nagkadto ang duha sa Prime Peak Subdivision, Barangay Maitim 2nd Central agud mag-inquire sa isa ka propiedad nga ginabaligya.
Ginapahayag nga nakakit-anay na sila sang supposed owner sang propiedad, apang sang buot na nga magsulod sa subdivision, nagsiling ang security guard nga indi na lang sila magdayon apang wala nila ini ginsapak.
Kasunod sini, nag-abot si Atty. Denis Santos, legal counsel sang subdivision, kag pila sa iya kaupdanan kag gin-alegar nga nagtiro sa duha ka pulis samtang nagasakay sila sa salakyan.
Nag-resulta ini sa pagbayluhanay sang lupok apisar nga nasamaran na nga daan ang mga pulis.
Pareho nga nag-angkon ang tatlo sang gunshot wounds nga nag-resulta sa ila kamatayon.
Suno kay Fajardo, duha ka mga indibidwal nga pareho nga security guards ang gin-aresto nga naangot sa insidente samtang may isa nga at-large. Gin-identify ang mga nadakpan nga sanday Elver Mabuti kag Benedicto Hebron nga kaupod sang abogado.
“Ito pong dalawang under custody at isang at large may nag-execute ng salaysay na sila rin po ay kasamang nagpaputok during the incident,”suno kay Fajardo. “Isa sa mga motibong tinitignan natin ay ito pong lupa na ito ay merong dispute between dito sa parte na nirerepresent ng abogado at doon sa nagpapakilalang may-ari na may pinapakita siyang titulo.”
Nagtukod na ang PNP sang investigation team agud magtipon sang mga ebidensya kag mga pahayag sang testigo para matumod ang matuod kag mga sirkumstansya nga nagapalibot sa insidente.
“The entire police force mourns the tragic loss of our brave officers. We will ensure that those responsible are held accountable and that justice is served swiftly,” pahayag naman ni PNP chief Police General Rommel Francisco Marbil.#
(Photo courtesy of PNP Public Information Office)
