Masobra na sa 10 ka mga tawo ang nagkalamatay bangud sa paglaslas ni Bagyo Enteng sa pila ka mga lugar sa Pilipinas partikular sa Luzon halin sang Domingo sang gab-i tubtub subong.
Kun pahat-pahaton ang reports sang local authorities kag wire agencies, sa Antipolo City, pito na ang na-rekord nga napatay lakip ang pito nga biktima sang landslide kag tatlo nga nalumos sa baha. Lakip sa napatay sa pagkatiphag sang duta amo ang nagabusong nga babaye kag duha ka mga bata edad 12 kag 15 anyos nga nagakatulog sang natabo ang insidente.
Sa Bicol sa Naga, isa ang nakuryente kag isa ka lapsag ang nalumos.
Duha ka landslides naman ang nagpatay sa duha ka tawo kag nag-guba sa lima ka mga balay sa Cebu suno sa local disaster office.
Apang kun basehan ang ginkumpirma sang National Disaster Risk Reduction and Management Council (NDRRMC), duha pa lang ang nalista nga fatalities kag 10 ang nasamaran sa Central Visayas.
Padayon ang abiso sang Office of Civil Defense (OCD) sa regional directors nga siguruhon nga epektibo ang pag-implementar sang advisories, preparedness kag response measures para sa Enteng kag epekto sang Habagat ukon southwest monsoon.
Magluwa sa linibo nga nagbakwit bangud sa baha, nag-report man ang Philippine Coast Guard (PCG) nga nagsaka sa 3,000 ang na-stranded sa seaports bangud sa malain nga tyempo.
Ini nga 3,383 passengers, truck drivers kag cargo helpers ang na-report nga naatrasar sang byahe sa Southern Luzon, Bicol, Eastern Visayas kag Western Visayas.
29 naman ka domestic flights ang ginkanselar sang Manila International Airport Authority (MIAA) kahapon bangud sa malain gid nga tyempo.
