ILOILO CITY – Magatukod ang Iloilo City Police Office (ICPO) sang special investigation task group (SITG) agud magpamuno sa imbestigasyon sa natabo nga pag-ransack sa Iloilo Supermart sa Tabuc Suba, Jaro, Iloilo City.
Sa interview sang Bombo Radyo kay Police Brigadier General Jack Wanky, director sang Police Regional Office 6 (PRO6), iya ginpahayag nga nakalab-ot na sa iya ang nasambit nga impormasyon, apang wala pa niya ini naaprubahan.
Suno kay Wanky, ginhatagan sini sang tyempo si ICPO Director Police Colonel Kim Legada nga matutukan ang nasambit nga kaso.
Magluwas diri, ginmanduan man niya ang Regional Intelligence Division nga magbulig sa ICPO.
Kadungan sini, nagpanawagan man si Wanky nga ipatuman sang insakto ang Closed Circuit Camera Television (CCTV) ordinance bangud dako ini nga bulig agud matumod ang mga suspek kun may kaangay nga insidente nga matabo.
Matandaan nga sa nasambit nga insidente, nagdangat sa P1.5 million ang nataban sang wala pa makilal-an nga mga kawatan.
