Naglab-ot sa 1,218 ka mga eskwelahan sa Western Visayas ang nagkanselar sang ila klase kahapon nga adlaw bangud man sa malain nga tyempo.
Sa interview sang Bombo Radyo kay Mr. Hernani Escullar Jr., Regional Information Officer sang Department of Education (DepEd) Region 6, iya ginpahayag nga on going ang ila nga assessment agud matumod ang mga eskwelahan nga madasig mabahaan kag makapadayon man sa pagtudlo.
Suno kay Escullar, nagakoordinar naman sila sang mga school heads agud hibaluon kon posible na makabalik ang ila klase.
Ginpat-ud man sini ginanahulat nila ang report sang tagsa ka sang school Disaster Risk Reduction and Management Service (DRRMS) agud matumod man ang mga nangin sitwasyon sang eskwelahan.
Nahibaluan nga may yara sang 65 ka mga eskwelahan ang nagsuspende sang klase sa San Carlos City; 504 sa Antique; 27 sa Victorias City kag 222 sa Negros Occidental.
Samtang, 190 naman ka buluthuan sa Iloilo; 39 sa Silay City; 70 sa Bacolod City; 14 sa Bago City; 66 sa Iloilo City; pulo sa Guimaras; isa sa La Carlota City kag pulo naman sa Himamaylan City.
