Ginlubong na ang pinakauna nga awardee sang Gawad sa Manlilikha ng Bayan (GAMABA) sa Western Visayas.
Ini amo si Federico “Nong Pedring” Caballero sang Brgy. Garangan, Calinog, Iloilo.
Sa interview sang Bombo Radyo kay Elsie Caballero Padernal, hinablos sang GAMABA awardee, iya ginpahayag nga kon mag-perform sila sang ila balaan nga saot, luyag gid ni Nong Pedring nga kompleto sila nga magpamilya.
Suno kay Padernal, ginakabig nila nga ‘gem kag treasure’ ang nangin leksyon kag kultura nga gintudlo sa ila ni Nong Pedring.
Gin-ako man sang natungdan nga tuman ang ila kahadlok kon may mabuhin pa gid nga myembro sang ila nga pamilya.
Ginkasubo naman sang hinablos sang GAMABA awardee nga daw kaangay nga napi-ang sila matapos nga nagtaliwan si Nong Pedring.
Nahibaluan nga nakilala si Nong Pedring sa iya nangin kontribusyon sa pagpalapnag sang tradisyon kag kultura sang Panay Bukidnon.
Gin-anunsyar naman ni President Ferdinand Marcos Jr. kahapon nga adlaw ang National Mourning Day, sa diin naka half-mast ang tanan nga hayahay sang Pilipinas para hatagan sang pagkilala ang pagtaliwan sini.
Ginakabig naman sang bise-alkalde sang Calinog, Iloilo nga dako ang nangin kontribusyon ni Nong Pedring indi lang sa ila banwa, kundi pati sa bilog nga Pilipinas kag kalibutan.
Suno kay Calinog Vice Mayor Andre Gustilo, bangud kay Nong Pedring, mas nakilal-an ang ila nga kultura, tradisyon, kag Indigenous People.
Nagpasalamat man ini kay Nong Pedring sa paghatag sang inspirasyon agud nga mas ma-preserve ang binuhatan sini sa Panay Bukidnon sa pungsod.
