Gintadtad-labo sang isa ka 70-anyos nga mangunguma ang ulo sang 56-anyos nga upod sini sa inom sa Barangay Poblacion, banwa sang Barotac Viejo, Iloilo.
Ang biktima naman amo si Alyas Alex, 56-anyos, mangunguma, residente sang Barangay Sincua, Lemery, Iloilo.
Ang suspek amo si Alyas Alonie, 70-anyos, mangunguma, residente sang Sitio Pal-ak, Barangay Poblacion, Barotac Viejo.
Sa interview sang Bombo Radyo kay Police Major Felix Alianza Jr., hepe sang Barotac Viejo Municipal Police Station, iya ginpahayag nga nag-inom ang duwa sang makahulubog nga ilimnon, kag tuyo na tani nga magpahuway sang suspek, apang gusto pa nga magpadugang inom sang biktima apang wala sini ginpahanugutan.
Suno kay kay Alianza, nagmaoy ang biktima rason nga gintadtad sang labo sang suspek ang ulo sini gamit ang malaba, matalo, kag duha ka tapak nga kalabaon sang binangon.
Ginpahayag man sini nga nagsungka na ang suspek sa ila nga estasyon kag narecover ang binangon nga ginamit sini sa pagpatay sa biktima.
Ginhingagaw naman dala sa ospital ang biktima apang gindeklara nga dead-on-arrival matapos nag-agum sang patal nga pilas sa ulo, li-og, kag guya, rason man nga nagguluwa ang utok sini.
Sa subong, yara na ang suspek sa kustodiya sang Barotac Viejo MPS kag pagasakaan sang kaso nga murder.
