ILOILO CITY – Nagalaom ang pamunuan sang Iloilo City Police Office (ICPO) nga mangin dako nga bulig ang special investigation task group (SITG) agud madasig nga masolbar ang natabo nga pag-ransack sa Iloilo Supermart sa Tabuc Suba, Jaro, Iloilo City.
Sa interview sang Bombo Radyo kay Police Colonel Kim Legada, director sang ICPO, iya ginpahayag nga ang nasambit nga task group ang bug-usan sang mga nagkalain-lain nga unit halin sa ICPO kag sa Police Regional Office 6 (PRO 6).
Suno kay Legada, nagahulag naman ang intelligence units sang kapulisan agud makatipon sang impormasyon sa mga suspek.
Nahibaluan nga nagwa sa preliminary investigations nga ang mga suspek ang possible myembro sang organized group nga nagagamit sang paagi kaangay sang “termite gangs”.
Una na nga ginpahayag ni PRO 6 director Police Brigadier General Jack Wanky nga nakalab-ot na sa iya ang impormasyon natuhoy sa task force, apang wala pa niya ini naaprubahan.
Matandaan nga sa nasambit nga insidente, nagdangat sa P1.5 million ang nataban sang wala pa makilal-an nga mga kawatan.
