Ginpasangkad pa sang Iloilo Police Provincial Office (IPPO) ang ila nga force multipliers paagi sa monitoring kag police visibility sa Iloilo.
Ini kasunod man sang paglapnag sang kinawatay pila ka mga establisyemento sa probinsya.
Sa interview sang Bombo Radyo kay Police Major Rolando Araño, spokesperson sang Iloilo Police Provincial Office, iya ginpahayag nga ang mga barangay tanod ang magaserbe nga force multipliers kaupod ang mga kapulisan agud nga mas mapalapit sa mga shopping malls.
Suno kay Araño, dako ang mangin papel sang mga tanod sa ila tikang ilabi na nga sila ang 24/7 nga naka-standby sa ila nga tagsa ka area of responsibility.
Ginpahayag man sini nga libuton sang talatapan ang tanan nga mga malls sa Iloilo agud nga mapasangkad ang ila security measures.
Gintumod man sang natungdan nga sekyaron man ang mga closed circuit television ukon CCTV agud matumod kon ini ang high definition (HD) ilabi na nga makabulig ini sa pagkilala sang mga kawatan.
Gin-athag man ni Araño nga ginmandu sang provincial director nga libuton ang tagsa ka commercial establishments kag sapulon ang mga security personnel agud mapabaskog ang pwersa sang force multipliers.
