Natukiban sang Iloilo City Health Office (CHO) nga bubon ang isa sa mga water sources sang pamilya sang napatay nga bata bangud sa gastroenteritis
Sa interview sang Bombo Radyo kay Rolando Fortuna, Medical Officer IV sang City Health Office, iya ginpahayag nga sa pagpadulong sang ila personnel sa puluy-an sang biktima, ila natumod nga ang ginagamit nila pangpaligo kag paghugas amo ang nagahalin sa bubon.
Suno kay Fortuna, apisar nga bottled water ang ginagamit nga ilimnon sang pamilya para sa bata, posible sa gihapon nga pugaran ini sang coliform bacteria bangud ang ginagamit nga panghugas sa sulodlan amo ang tubig nga naghalin sa bubon.
Ginpahayag man sini nga ang nasambit nga bacteria ang posible makatuga sang impeksyon kag mahulog sa septic shock nga natukiban man sa kondisyon sang napatay nga bata.
Gin-athag man sang natungdan nga makita sa pisikal nga sintomas ang amo nga impeksyon, kon ang bata ang nagahilanat, nagapalamula ang tutonlan, kag nagsuluka.
Santo sa data sang talatapan, as of September 5, 2024, yara na sa pulo ang mga napatay bangud sa balatian, kon sa diin, mas mataas kon ikumpara sa datus sang nagligad nga tuig.
