Ginkumpirma sang athletics federation sang Uganda nga napatay gid ang ila Olympian marathon runner inadlaw matapos ginsunog ini sang iya nobyo.
Ang biktima amo si Rebecca Cheptegei, 33, nagapuyo sa Kenya, kag nagpang-44 anay sa women’s marathon nga iya ginpasakupan sa Paris Summer Games sang nagligad gid lamang nga bulan.
“We are deeply saddened to announce the passing of our athlete, Rebecca Cheptegei early this morning who tragically fell victim to domestic violence,” suno sa X post sang Uganda Athletics Federation. “As a federation, we condemn such acts and call for justice. May her soul rest In Peace.”
Domingo sang natabo ang insidente sa balay sang biktima sa western Trans Nzoia County.
Ginpahayag nga nagkadto sa ila balay ang iya boyfriend nga si Dickson Ndiema nga may dala nga gasolina. Base sa report sang pulis, may nabatian pa nga singgitan ang mga kasilingan bangud sa away sa duta antes ginbubuan sang suspek sang gasolina ang lawas sang babaye kag ginsunog.
Bangud sa pagkarab-karab sang iya lawas, halos 80% gid ang nasunog kag sini lang nga Myerkules, ginkumpirma sang ospital nga nagsuprer ang biktima sang multi-organ failure nga rason nga ginbawian gid ini sang kabuhi.
Ang suspek naman nga nakaangkon man sang sunog sa 30% nga parte sang iya lawas ang padayon pa nga ginabulong sa ospital sa syudad sang Eldoret.
Nagpasalig man ang Kenya nga maga-imbestigar sila sa insidente.
“Kenyan authorities are investigating the circumstances under which she died and a more detailed report and program will be provided in due course,” suno kay Ugandan minister of state for sports Peter Ogwang.
Ikatatlo na si Cheptegei nga elite female athlete nga ginpatay sa Kenya sa sulod lamang sang tatlo ka tuig.
Sang 2021, ginpatay man ang isa ka 25-anyos nga Olympic runner sa iya balay kun sa diin ginhatok-hatok ini sang buno sa iya liog. Ang iya bana ang ginpasakaan sang kaso nga murder.
Pila ka bulan lang ang nagligad, isa pa ka 28-anyos nga Kenyan athlete ang nasapwan-patay man sa iya balay, ginapatihan nga ginkuga, kag ang iya boyfriend man ang main suspect.
Base sa latest figures sa Kenya National Bureau of Statistics nga nabalhag sang January 2023, nakabutang nga 34 percent sang mga babaye sa amo nga pungsod ang naga-eksperyensya sang physical violence halin sa edad nga 15-anyos.
