Dakop ang lima ka mga indibidwal matapos ginkasa ang drug buy-bust operation sa Barangay Our Lady of Fatima, Jaro, Iloilo City.
Ang mayor nga subject amo si Jermiene James, 47, sang San Nicolas, Lapaz; kaupod sini sanday Henry Cordova, 57, residente sang Caingin, Lapaz; Chad Vincent Jaruda, 34, city hall employee, kag residente sang Ticud, Lapaz.
Lakip man sa mga nadakpan ang magnobya nga sanday Rey Laurence Laurea, 35, kag Nikki Vista, 25 sang Alta Tierra, Jaro, Iloilo City.
Sa interview sang Bombo Radyo kay Police Lieutenant Jolie John Bandojo, team leader sang City Drug Enforcement Unit (CDEU), iya ginpahayag nga madugay na sang nagsugod nga i-monitor sang talatapan ang mga subject, antes nga natigayon nga nadakpan.
Suno kay Bandojo, nabaklan ang mga subject sang isa ka plastic sang suspected shabu gamit ang ₱10,000 nga buy-bust money.
Ginpahayag man sini nga na-recover sa mga subject ang 55 grams sang suspected shabu nga nagabalor sang ₱374,000.00.
Nagapangatubang sang kaso nga paglapas sa RA 9165 ukon comprehensive dangerous drugs act of 2002 ang mga nadakpan nga suspetsado.
