Magaserbe bilang commander si Iloilo City Police Office (ICPO) Director Police Colonel Kim Legada sa gintukod nga Special Investigation Task Group Iloilo (SITG) para sa pagpangransak sa Iloilo Supermart sa Barangay Tabuc Suba, Jaro, Iloilo City.
Ini kasunod man sang order sang Police Regional Office 6 (PRO6).
Sa interview sang Bombo Radyo kay Police Major Shella Mae Sangrines, tigpamaba sang Iloilo City Police Office, iya ginpahayag nga magatindog bilang Assistant SITG si Deputy City Director for Operations (DCDO) Police Lieutenant Colonel Lorenez Losaria.
Suno kay Sangrines, 21 tanan ka police mga personnel ang pagasakopan sang task group, kon sa diin, 11 diri ang Commissioned Officers kag 10 naman ang Non-Commissioned Officers.
Ginpahayag man ni Sangrines nga siya ang magaserbe nga spokesperson sang amo nga task group.
Tinutuyo naman sang Special Investigation Task Group Iloilo, nga mapasangkad ang koordinasyon sa iban nga law enforcement agencies agud makabulig sa pagtul-id sang mga suspetsado.
Nahibaluan nga nagdangat sa P1.5 million ang balor nga nataban sang mga suspetsado sa pagpang-ransack sang Iloilo Supermart.
