Nagpromisa ang Office of the LGTBQ (Lesbian, Gay, Bisexual, Transgender, and Queer) Affairs sang city government nga magapanguna sa ipatuman nga drug testing.
Ini kasunod man sang pagkaaresto sang isa sa mga driver sang talatapan matapos ginkasa ang drug buy-bust operation sa Jaro, Iloilo City.
Sa interview sang Bombo Radyo kay Gab Umadhay, focal person, Office of the LGBTQ affairs, iya ginpahayag nga ila ginakasubo ang pagkaulamid sang ila katapo nga driver sa iligal nga droga.
Suno kay Umadhay, magaupod sila sa panindugan ni Iloilo City Mayor Jerry Treñas nga wala sang exempted sa patigayunon nga drug testing sa tanan nga empleyado sang Iloilo City Hall.
Ginpahayag man sini nga paagi sa ila pagpakigbahin sa tikang, mas mapasangkad pagid ang kampanya batok sa iligal nga droga.
Nagpasalig man ang natungdan nga magapanguna ang ila talatapan nga magpaidalum sa drug test.
Ginakabig man ni Umadhay nga isa ka isolated case ang natabo kag wala ini nagalaragway sa mga programa kag plano nga ginaduso sang talatapan.
