Luyag ni Iloilo Board Member kag Liga ng mga Barangay President Amalia Victoria Debuque nga ipatuman sa tanan nga mga barangay sa Iloilo ang 4’oclock habit kontra dengue.
Sa interview sang Bombo Radyo kay Debuque, iya ginpahayag nga sa iya ginpahayag nga ang amo nga tikang ang hugot nga ginapatuman sa ila banwa sa Anilao, Iloilo.
Suno kay Debuque, indi masarangan sang fogging lang ang pagpapas sa mga lamok, kon sa diin, mas mangin epektibo pagid ini kon lakipan sang maid-id nga pagpanglimpyo.
Ginpahayag man sini nga indi man tanan nga barangay sa probinsya ang sarang nga magbakal para makapatuman sang fogging.
Gintumod man sang natungdan nga mas “cheaper” ukon barato ang 4’oclock habit kag wala na sang dugang pa nga gastuhon.
Ini kasunod man sang limited nga budget sang probinsya para sa pagpakigbato sa dengue.
